CAGAYAN DE ORO CITY- Kapin sa 74-mil 558 ka tawo sa nagkadaiyang bahin sa nasud ang nakapahimulos sa tinuig nga Bombo Medico sa Bombo Radyo Philippines. Kini alayon sa gipahigayon nga Bombo Medico 2017 sa mga nag-unang lugar sa Pilipinas nga adunay Bombo Radyo ug Star FM stations kagahapong adlawa.
Nahimong makasaysayanon ang Bombo Medico tungod kay mao kini ang ika-51 nga anibersaryo sa katukuran sa Bombo Radyo Philippines niadtong tuig 1966.
Gawas sa 38-mil 234 ka benepesaryo nga nahatagan sa serbisyong medikal, anaa usab sa 10-mil 777 ang naka-avail sa dental services, samtang moabot 25-mil 547 ang nakadawat sa laing libreng serbisyo sama sa libreng pustiso, pagtuli, cheelchairs, libreng crutches, mga sungkod, ECG, haircut, massage, HIV testing, legal services ug daghan pang uban.
Ning tuiga,moabot usab sa P9.5 milyon nga balor sa mga medisina ug ubang health products ang gipanghatag sa mga nagkinahanglan sa tabang sa tambal sama sa dental patients ug P1.6 million sa dentures .
Mokabat sa P29.823 milyong balor sa libreng konsulta,pag-ibot sa ngipon ug uban pang mga serbisyo ang nahatag nga libre pinaagi sa mga espeyalistang doktor, dentista ug ubang allied health professionals nga kinaskingkasing naghalad sa ilang oras aron makatabang sa katawhang mga kabus.
Ang simultaneous nationwide medical ug dental mission ang usa sa mga programa nga namugna sa pagpangulo sa chairman sa Bombo Radyo Philippines nga si Dr. Rogelio M. Florete aron matabangan ang mga kabus nga katawhan isip kabahin sa corporate social responsibility.
Ang usa pa ka proyekto sa Network nga himoon sa matag-buwan sa Nobyembre ang Dugong Bombo.Ang blood letting activity ang dungan usab nga ipahigayon sa Bombo Radyo ug Star FM Stations nationwide.
Subli makauban sa paghatag serbisyo sa Bombo Medico 2017 aron ihalad ang ilang mga panahon ug abilidad ang mga doktor;dentista;pharmacists;nurses;nursing aids;volunteers ug ubang grupo nga moabot sa 3-mil ka indibidwal diin wala pa’y labot niini ang mga personahe sa Bombo Radyo ug Star FM stations nationwide.
Gawas sa medical checkup,dental services,libreng gamot,ang ubang serbisyo nga ihatag ang naglakip sa reading glasses,wheelchairs;walkers,canes,posteso,masahe,haircut ug uban pa.
Samtang,kaabag sa Bombo Radyo ug Star FM sa Bombo Medico 2017 ang Generika;Ferc C;Skelan; Alaxan;Enervon;Athena; Neurogen E,;Crave Chips ug Absolute Bottled Water.Ang mga lugar diin himoon ang Bombo Medico 2017 ang gilangkuban sa mga syudad sa Metro Manila;Tuguegarao;Cauayan;Laoag;Vigan; La Union; Dagupan;Baguio;Naga;Legazpi;Bacolod;Iloilo;Roxas; Kalibo; Cebu;Tacloban;Davao;General Santos;Butuan;Koronadal;Cotabato;Dipolog;Cagayan de Oro ug Zamboanga City.
Una nang naka-benepisyo ang 4-mil 380 ka mga kabus nga katawhan sa mga serbisyong medical nga gitunol atol sa Bombo Medico 2017 nga gihimo diha sa Capitol University Gym kagahapong adlawa.
Gidagsa sa katawhan gikan ning dakbayan ug kalungsuran sa Misamis Oriental bisan sa kabalaka sa seguridad tungod sa hadla sa terorismo gumikan sa nagpadayong krisis sa Marawi City.
Moabot sa 1,495 ka kabus ang nahatagan sa serbisyo medikal, samtang 407 ang nakapahimulos sa dental services.
Mokabat usab sa 2,478 ka benipisyaryo ang natunulan sa uban pang mga serbisyo sama sa cataract screening, reading glass, prostate cancer screening, sugar testing ug feeding.
Lakip sa naserbisyohan sa Bombo Medico ang mokabat sa 20 ka bakwit gikan sa Marawi City.
Gibutyag sa evacuee nga si Faisah Maruhom, 60 anyos, minyo nga taga Barangay Pangao nga dako ang natabang sa Bombo Medico ngadto kanila ilabina nga nakasinati sila’g grabeng trauma tungod sa pag-atake sa Maute-ISIS group sa ilang syudad.
Si Maruhom miingon nga saludo sila sa Bombo Radyo kay walay pili ang pagtunol niini’g serbisyo, ilabina kanila nga evacuees nga nanginahanglan ug hinabang.
