(Update) CAGAYAN DE ORO CITY – Misaka pa sa 75 ka pamilya ang apektado sa pagkasunog sa sobra 30 ka balay diin dunay tulo ka residente ang nagbaton sa ginagmay’ng samad dihang nahitabo sa Zone 4-B,Sitio Tambo,Vamenta Boulevard,Brgy Carmen ning syudad.
Kini subay sa ulahing gitaho sa Bureau of Fire Protection -Cagayan de Oro District kabahin sa hitabo.
Gibutyag ni BFP-CdeO District spokesperson SFO3 Imelda Barazan nga apil sa giimbestigaran sa ilang mga imbestigador ang posibleng depektosong linya sa koryente ingon man ang impormasyon nga dunay napasagdan nga pagluto sa ikaduhang andana nga balay nga iya sa pamilyang Binarao kaganihang kadlawon.
Siya miingon nga hinoon,paspas nakatubag ang BFP kuyog ang fire volunteer groups aron mapadali ang pagsanta sa dakong kalayo.
Naapil usab ang gamay’ng bahin sa Golden Heritage Polythecnic State College sanglit duol lang kini sa lokasyon sa sunog.
Samtang wala usab makaapil pagkasunog ang simbahang Kristiyano taliwala sa kadako sa kalayo.
Natugaw usab ang nag-vigil sa pamilya ug mga kabanay nga dunay gihaya dihang napugos paghikling sa minatay aron kalikayan ang sunog.
Mitala sa pasiunang estimated structural damage nga P2-M ang sunog.
Sa pagkutlo ning balita,anaa temporaryong nagsaka sa mga kabanay ang pipila ka apektong mga pamilya samtang ang uban gidala sa public school sa Macanhan sa maong brgy.
