CAGAYAN DE ORO CITY -Nahidangat na dinhi sa syudad ang technical personnel sa kompanya nga tag-iya ug nagbaligya sa unmanned aerial vehicle o UAV nga hawid sa Philippine Air Force.
Kini human nahagsa ang usa sa Hermes 900 UAVs samtang gipalupad sa bisinidad sa kanhi Lumbia Airport ug napadpad padulong sa Brgy Pualas,Baungon,Bukidnon sa miaging Sabado sa buntag.
Gibutyag ni PAF spokesperson Col Menard Mariano nga gilauman nila nga nakuha na gikan sa crash site ang ilang UAV aron ipaubos sa imbestigasyon sulod sa airport.
Gikompirmar usab ni Mariano nga grounded una ang laing walo ka UAVs samtang dili pa mahatagan sa katin-awan ang nahitabong pagkahagsa sa miaging semana.
