CAGAYAN DE ORO CITY, Philippines – Walo ka mga langyaw ang nadakpan sa Bureau of Immigration (BI) gumikan sa kasong “illegally staying” sa Pilipinas.
Gibutyag ni Commissioner Joel Anthony Viado nga pulos mga Insek ug Vietnamese Nationals ang mga nasikop human kini naglatagaw sa tolo ka dalan sa Muntinlupa City niadtong oktobre 22.
Gipasalamatan ni Viado ang mga miyembro sa Ayala Alabang homeowners association nga maoy mitabang kanila sa pagtumbok sa mga gipanaguang puy-anan sa mga langyaw.
Narekober sa mga ahente sa Department of Justice (DOJ) ug National Bureau of Investigation (NBI) ang mga ekipo nga gituohang gigamit sa mga langyaw sa ilang ilegal nga operasyon sama sa online scamming.
Gitakdang edeport ang mga dinakpan pagkahuman sa pagproseso sa ilang mga dokumento.
