CAGAYAN DE ORO CITY – Gitahasan ni Comelec 10 regional director Atty Francisco Pobe Jr ang 8-mil 426 ka security forces ingon man ang puwersa sa Dep-Ed nga himoong malampuson ang piliay sa Mayo 9 sunod semana.
Gihimo sa opisyal ang mensahe atubangan sa tropa atol sa hiniusang multi-agency send-off ceremony sa New Grandstand,Camp Alagar ning syudad.
Gibutyag ni Pobe nga dili trabaho sa Comelec,AFP,PNP,PCG ug Dep-Ed nga makab-ot ang katoohan nga resulta sa piliay apan nag-agad usab kini sa kooperasyon sa tanang katawha nga molambigit niini sunod semana.
Dugtong niini,gi-garantiya ni Police Regional Office 10 Director Brig Gen Benjamin Acorda Jr ang kaandam sa puwersa niini paghatag sa full scale security alang sa piliay sunod semana.
Partikular nga gitumbok sa heneral ang mga lugar nga dunay init nga bangi sa politika sa mga kandidato sama sa Misamis Occidental nga ubos sa kontrol sa Comelec.
Gipasidan-an usab ni Acorda ang ilang puwersa nga likayan ang pagsilbing bayas aron dili madaot ang pagsalig sa publiko ngadto sa security forces nga gitahasan aron molampos ang May 9 elections.
Samtang nanganti usab si 4th ID commanding officer Maj Gen Wilbur Mamawag kuyog ang 1st ID,Philippine Army nga makatutok ang ilang tropa pagsanta sa mga himoong sabotahe sa CPP-NPA-NDF sa ilang tagsa-tagsa ka area of responsibility.
Miingon si Mamawag nga sama sa PNP ug ubang govt security forces,gidi-an usab sa AFP ang ilang mga sakop nga magsilbing partisan sa umaabot May 9 elections.
Hisayrang ubos sa hurisdiksyon sa 4th ID ang Misamis Oriental,Bukidnon ug Camiguin samtang sakop usab sa 1st ID ang probinsya sa Lanao del Norte ug Misamis Occidental.
