CAGAYAN DE ORO CITY – Masaligon ang militar nga ubay-ubay pa ka mga rebeldeng New Peoples Army (NPA) ang gikatakdang motahan balik sa sabakan sa gobyerno.
Sa pakighinabi sa Bombo Radyo, gibutyag ni 1st Special Forces Battalion, Special Forces Regiment (Airborne) civic military officer Major Frankjo Boral nga dili na makaya sa pipila ka NPA ang kagutom ug sobra katugnaw nga nasinatian sa kabukiran.
Gani, kini matud pa ang rason kung nganong nahukman sa walo ka mga NPA nga motahan sa mga sundalo. Bitbit ang nagkaidayang klase sa armas, mitahan sila si Alyas JOSEPH, dala ang Cal .30 M1 Garand Rifle; Alyas JANDO (1 ka Cal .30 M2 Carbine); Alias FELIPE , (1 ka Cal .45 improvised rifle); JAGUAR (Cal .9mm KG-9 submachine gun); alyas JOHN/JOMAR (1 ka locally made Cal .9mm Baby Ingram submachine gun); Alias RIBS (1 ka locally made Cal .9mm Baby Ingram submachine gun); alias REX (1 ka improvised M79 grenade launcher); ug alyas GAMARA kinsa kapikas ni alyas Jaguar diha sa may Purok 2, Brgy Mendis, Pangantucan, Bukidnon.
Gipasalig ni Boral nga mahatagan sa igong benepisyo ubos sa E-CLIP sa gobyerno ang mga rebel returnees.
