Misaka pa sa walo ka tawo nag nakalas sa pag-igo sa Bagyong Basyang (international name: Penha) sa Northern Mindanao ug Caraga.
Subay sa data sa Office of the Civil Defense, upat ang namatay sa Cagayan de Oro gumikan sa landslide.
Tolo ang gideklarar nga patay sa Iligan City, samtang usa ang namatay sa pagkalumos sa Agusan del Norte.
Subay sa pinakabag-ong situational report sa National Disaster Risk Reduction and Management Council (NDRRMC), misaka pa sa 30 ka barangay sa Caraga region ang apektado sa baha ug pagdahili sa yuta.
Kini gilangkoban sa 64,360 ka pamilya o 232,550 ka indibidwal sa 517 barangay.
Sa maong numero, 16,528 ka pamilya o 53,983 ka tawo ang kasamtangang nanunuluyan sa 480 evacuation centers, samtang 4,489 ka pamilya o 16,807 ka indibidwal ang gitabangan sa gobyerno sa gawas sa mga evacuation facility.
Na-report usab ang kadaot sa imprastraktura, lakip ang tulo ka kalsada ug duha ka tulay nga dili madaanan sa Caraga.
Nagka-power outage sa 14 ka lungsod ug munisipalidad, ug hangtod karon lima ka lugar ang wala pa’y kuryente samtang siyam ang naibalik na ang suplay.
Dugtong niini, anaa sa 9,532 ka pamilya o 31,981 ka indibidwal ang gi-preemptive evacuation sa lain-laing rehiyon: 1,343 ka pamilya (6,270 katao) sa Negros Island Region, 784 ka pamilya (2,498 katao) sa Central Visayas, ug 6,878 ka pamilya (23,093 katao) sa Caraga.
Sa kinatibuk-an, 10,083 ka pamilya ang giila nga nanginahanglan ug tabang, nga adunay relief assistance nga nagkantidad ug ₱6.51 milyon.
