Naningkamot ang kapin 80 ka pamilya gikan sa nagkahiusang grupo sa Dumagat, Maranao, Manobo, ug Higaonon sa Mambuaya nga maka-atbang sa sunod-sunod nga kasong gipasaka batok sa komunidad aron mapahawa sa ilang gipuy-an.
Gipadayag ni Lay Theologian Wilson Amad nga pamaagi kini sa pikas bahin aron pugson ang mga molupyo nga mogasto og dako sama sa abogado nga nagkantidad og 40,000 pesos sa MTC ug 80,000 pesos sa RTC nga bug-at kaayo para sa mga kabus.
Gumikan niini, nanawagan si Amad sa interreligious dialogue ug sa mga legal counsel nga hatagan og konsiderasyon ang grupo samtang wala pa natubag sa korte ang gi-duso nga TRO sa demolition ug ang kaso didto sa Ombudsman.
Gawas pa niana, bisan ang mga lumad nga aduna na’y kaugalingong titulo gikan sa ginikanan gilakip gihapon sa kaso, hinungdan nga nagkahiusa ang komunidad nga mobarog alang sa katarungan.
