CAGAYAN DE ORO CITY-Paralisahon sa transport groups ngadto sa 80 porsiento ang dagan sa trapiko atol sa ilusad nga nationwide transport strike sa syudad karong Lunes Pebrero 27.
Gibutyag ni Joel Gabatan, regional coordinator sa National Confederation of Transport Union o NCTU-Northern Mindanao na andam na sila magwelga kuyog ang kapi’g 20 ka grupo sa
transportasyon sa maong adlaw.
Dismayado si Gabatan tungod kay may pipila ka grupo usab sa transportasyon nga mihimo’g
pagpangdaot aron maguba ang ilang ipahigayon nga welga.
Nag-unang tinguha sa welga ang pagpangayo’g 5 ka tuig nga moratorium sa pag-phase out sa mga pasayruhang sakyanan nga nag-edad 15 anyos pataas.
Ilusad sa grupong STAREX- PISTON Northern Mindanao ang lihok-protesta atubangan sa buhatan sa LTFRB-10 diha sa Brgy Patag sa syudad ugmang adlawa.
Kini alayon gihapon sa ilang pagduyog sa nationwide transport strike nga gipasiugdahan sa mga dagkong transport group sa kauluhan.
Gibutyag ni STAREX-PISTON regional spokesperson Ringo Lago nga mohimo usab sila sa caravan nga manukad sa Rodelsa Circle sa Brgy Macasandig sa syudad padulong sa buhatan sa LTFRB office diin moyagyag sa ilang kadismaya sa gobierno.
Samtang hataga’g hugot nga seguridad sa kapolisan ang mga driver nga mohimo’g transport strike
palibot sa syudad sugod sa kadlawon ugmang adlawa.
Gibutyag ni Cagayan de Oro City Police Office o COCPO spokesperson C/Insp Mardy Hortillosa II nga tuyo niini nga dili mahilabtan ang grupo sa transporation nga mohimo’g welga sa adlaw’ng
Lunes.
Partikular usab nga tutukan sa kapolisan ang pipila ka tawo nga mosakay sa panahon diin mohimo’g pagpangbutang sa mga suyak aron maperhisyo ang mga motorista o pasahero.
Sa pikas bahin,agdon sa DepEd-10 ang mando sa mayor o gobernador kabahin sa deklarasyon sa kanselasyon sa klase kon gikinahanglan dinhi sa rehiyon.
Kini tungod kay may mga lugar diin nahimutang ang mga pampublikong tunghaan nga dili direktang apektado sa transport strike nga ipahigayon sa adlaw’ng lunes.
Gibutyag ni DepEd regional director Dr Allan Farnazo nga wala kanila ang gahom mohimo sa kanselasyon sa klase ilabina nga isyu sa transportasyon ang sentro niini.
Hinoon,diskresyon sa pipila ka pribadong tunghaan ang pag-oktaba sa klase sa ilang mga tinun-an ilabina kon tataw nga maglisod kini sa pagdalikyat sa tunghaan gumikan sa kakulang sa mga sakyanan.
