CAGAYAN DE ORO CITY – Ilusad sa solid political supporters ni kanhi Pres Rodrigo Duterte ang ubay-ubay’ng kalihukan alayon sa iyang ika-80 anyos nga adlaw’ng natawhan sa syudad ugmang adlawa.
Kini ang gikompirmar sa iyang suod nga higala ug alyado sa politika nga si District 2 City Councilor Girlie Balaba kabahin sa walay hunong nga pagpaabot suporta ngadto sa kanhi presidente sukad gipabilanggo sa International Criminal Court sa The Hague,Netherlands.
Miingon si Balaba nga himoon ang kalihukan sa Macasandig Boulevard diin makasul-ob ang mga partisipante sa kolor berde nga sinena.
Siya miingon nga unang mohimo’g motorkada ang tulo ka bikers sa pipila ka bahin sa syudad ayha sundan sa nagkadaiyang performances ugman sa hapon.
Dugang niini nga pagtakdo alas 7:00 gabii,adunay himoon nga inter-faith prayer rally aron iampo ang dinalian ang pagpagawas kang Duterte aron makauli na sa Pilipinas.
Mitapos kini sa pag-ingon nga pag-abo sa alas 8:00 sa gabii, mao ang dungan nga pagkanta sa tanang Duterte supporters sa tibuok kalibutan sa birthday song.
Hisayran kauban pagsaulog ni Duterte sa birthday niini sulod sa detention facility sila Honeylette Avancena,magsoong Vice Pres Sara Duterte ug Kitty Duterte.
