Naalarma ang mga residente sa Adela Subdivision, Barangay Camaman-an human masuta ang presensya sa 81mm mortar shells nga dugay nang natago sa usa ka panimalay, hinungdan nga dinalian nga miresponde ang kapulisan ug Bomb Squad kagabii sa alas 10:30.
Matud sa impormasyon nga nakuha sa Bombo Radyo Team, tulo na ka tuig nga nakatago ang maong mga mortar shells sa panimalay ni alyas “Koy.”
Giingon nga nakuha kini sa basura tungod sa batasan sa tagbalay nga pagpunit og bisan unsang butang ug pagtago niini sa likod sa ilang balay.
Nakita kini sa usa sa iyang mga silingan nga dali nga nagpahibalo sa PS2 Cogon Police Station tungod sa kahadlok sa mga residente.
Nasuta sa mga kapulisan kauban ang Bomb Squad nga aktibo pa ang maong mga mortar shells, ug sa pagkakaron gikuha na sa Bomb Squad ang duha ka mortar shells. –
