Nakatala og 89 porsyento nga suporta gikan sa mga respondents ang gipagawas nga feasibility study sa Technical Working Group alang sa gihangyo nga pagpatukod sa bag-ong Cagayan de Oro City Government Complex.
Gipahayag ni Technical Working Group Head Prof. Jestoni Babia nga nakita sa usa ka tuig nga gihimong pagtuon ang dakong panginahanglan sa pagbalhin ug pag-modernize sa mga pasilidad sa dakbayan.
Gitin-aw sa opisyal nga kapin 80 porsyento sa mga kasamtangang opisina ang nag-atubang og kahuot ug kakulang sa luna, samtang 71 porsyento ang andam na alang sa digitalization sa mga serbisyo publiko.
Dugang pa ni Babia, nagpakita ang gihimong siyentipikong pagtuon nga makatabang ang bag-ong complex aron mas mahimong paspas, konektado, ug episyente ang paghatag og serbisyo sa tanang Kagay-anon.
