CAGAYAN DE ORO CITY – Subling gipamatud-an sa katawhan ang ”bayanihan spirit” pinaagi sa paglambigit sa laing kalampusan sa “Dugong Bombo” 2019 sa Bombo Radyo Philippines.
Gidawat sa blood donors ang panawagan sa Bombo Radyo ug Star FM stations nationwide nga boluntaryong maghatag sa ilang dugo aron matubag ang kakulangon sa suplay.
Ang maong kalihukan ang kabahin sa pangandoy ni Dr. Rogelio M. Florete, Chairman of the Board sa Bombo Radyo Philippines nga subling pukawon ang “spirit of volunteerism” aron matabangan ang mga nanginahanglan sa dugo.
Pipila sa mga lugar sa nasud ang wala na manumbaling sa kahimtang sa dautang panahon, taas nga biyahe, taas nga linya ug adunay pipila nga mibati’g kahadlok sa nasinatiang aftershocks sa pipila ka bahin sa Mindanao, maka-donar lamang sa ilang dugo.
Ang tinuig nga Dugong Bombo 2019 ang dungan nga gihimo sa 24 key cities nationwide nga adunay istasyonan sa Bombo Radyo ug Star FM.
Moabot sa kinatibuk-ang 9-mil 190 indibidwal o blood donors ang boluntaryong nakiglambigit sa dugu-ong blood letting activity diin kaabag ang Philippine Red Cross.
Ang donasyon sa dugo nga natigom sa maong proyekto ang giggahin alang sa mga biktima sa dengue, kidney failures, biktima sa nagkadaiyang kalamidad ug bisan sa emergency blood transfusion ug procedures sa mga hospital.
Moabot sa kinatibuk-ang 9-mil ,190 successful blood donors ang boluntaryong naghatag sa ilang mga dugo para sa Dugong Bombo bloodletting project.
Ang maong ihap sa mga successful blood donors bugti sa 4,135,500 million cc sa dugo.
Ang 4,135,500 million cc susama kadaghan sa 4,135.50 litro sa dugo o moabot sa 1,092.48 gallons (4 liters per gallon) o 19.86 or 20 drums sa dugo nga natigom. (standard drum is 200 liters).
Apan ang maong data ang dili pa pinal tungod kay temporaryong gi-oktaban una sa Bombo Radyo Cauayan ang Dugong Bombo tungod sa bagyong Ramon diin gihimo nga evacuation centers ang venues.
Himoon sa lugar ang maong kalihukan posible ning semanaha.
Samtang dinhi sa Northern Mindanao, ang Bombo Radyo Cagayan de Oro ang nakatigom sa 1,146 blood donors, 515,700 cc sa dugo kon 515.70 (liters) ; 136.23 US galloons; 2.48 drums nga gihimo sa upat ka venues sa syudad,Misamis Oriental ug Iligan City.
Sa tanang successful blood donors, ang among walay puas nga pagpasalamat ingon man sa mga naglaraw nga magpakuha sa dugo apan napakyas tungod sa pre-screenig requirements sa blood pressure, anemia, alcohol intake, tattoo ug uban uba pa. Kamong tanan ang BAYANI sa inyong kaugalingong paagi.
Amo usab pagpasalamat sa Philippine Red Cross nationwide, DoH,volunteers, partners ug daghan pang mga grupo nga nag-donors sa snacks.
Ang Dugong Bombo ang usa lamang sa daghang proyekto sa Bombo Radyo Philippines nga adunay corporate social-cultural responsibility gawas sa Bombo Medico, ug Bombo Music Festival.
Dugong Bombo 2019…A Little Pain…A Life to Gain… Basta Radyo… Bombo!
Gihimo nga birthday gift ni Lester Palacio sa iyang kaugalingon ang pagdonar sa iyang dugo sa Dugong Bombo 2019 nga gipahigayon diha sa Limketkai Atrium niadtong Sabado.
Si Palacio kinsa miembro sa LGBT+ community miingon nga nagsaad siya sa iyang kaugalingon nga inay modawat siya’g regalo sa adlaw’ng natawhan niadtong Nobyembre 8, mas maayo nga siya ang mohatag isip regalo sa dugo sa mga nanginahanglan.
Ang 26-anyos nagbaton sa type AB nga dugo nga sagad gapangitaon sa Philippine Red Cross kay limitado lamang kini nga klase sa dugo.
Inspirasyon sa taga Opol, Misamis Oriental nga si Fernando Lomo ang iyang namatay’ng higala hinungdan nga kanunay siya gapakuha’g dugo sa Dugong Bombo matag tuig.
Sumala sa estudyante sa Opol Community College nga nakita niya kamahinungdanon sa dugo tungod sa iyang higala nga nagbaton sa sakit nga lupus.
Gibutyag usab niini nga gitudlo kanila sa ilang kurso nga Bachelor of Elementary Education ang kamahinungdanon sa volunteerism hinungdan nga himoon niya nga matag tuig ang pagdonar sa iyang dugo.
Nasabutan sa magtiayong Golye nga magdonar sa pinakaunang higayon sa ilang dugo sa Dugong Bombo 2019 aron makatabang sa ilang isigkatawo.
Si Ramil Golye, 46-anyos miingon nga wala sila’y kapas sa iyang kapikas nga si Maria Jane Golye, 42-anyos nga motabang sa pinansyal nga aspeto hinungdan nga nahukman nila nga motabang sa ilang isigkatawo pinaagi sa pagdonar sa ilang dugo.
Si Ramil Golye ang nagtrabaho isip laborer sa Westbound Terminal Public Market diha sa Barangay Bulua ning syudad.
Gihimo nga hagit sa iyang kaugalingon sa Opol Community College student nga si Daniel Garcia ang pagpakuha sa iyang dugo sa Dugong Bombo.
Gibutyag sa 21-anyos nga taga Camp Evangelista, Brgy Patag ning syudad nga first time niya nga magpakuha’g dugo hinungdan nga nagsagol ang iyang gibate nga kakulba ug kahadlok.
Apan, tungod sa iyang motto sa kinabuhi nga “Conquer your Fear”, nahukman niyang magpakuha’g dugo.
Gani, gisaysay niini nga “Feeling victorious” siya human makuhaan sa iyang dugo.
Gipaambit sa usa ka nutritionist ug dietician ang iyang beauty secrets hinungdan nga namintinar niya ang kahamis sa iyang dagway ug kasinaw sa pamanit.
Gibutyag ni Hannah Anlac kinsa nagtrabaho sa Northern Mindanao Medical Center nga ang regular niya nga pagdonar sa dugo mao ang nakawala sa iyang acne sa dagway.
Siya miingon nga napuno sa bugas-bugas ang iyang nawong dihang nagtungha pa siya sa kolehiyo.
Asoy pa niini nga ang kanunay nga pagdonar sa dugo, makapawala sa toxic sulod sa lawas sa tawo.
