CAGAYAN DE ORO CITY – Misaka na sa siyam ang mga tawo nga gipaubos isip person under investigation o PUI tungod sa pagduda nga nagbaton sa sintomas sa novel coronavirus sa Northern Mindanao.
Kini ang kompirmasyon ni Department of Health o DoH Asst regional director Dr David Mendoza sa pakighinabi sa Bombo Radyo.
Apan gitin-aw ni Mendoza nga sa maong ihap, usa niini ang nakagawas na diha sa sa Northern Mindanao Medical Center o NMMC samtang duha kanila ang pabiling gi-monitor human makasulod sa 14-days mandatory quarantine.
Pabiling gipamugos ni Mendoza nga wala pay bisan usa ka pasyente ang nagpositibo sa coronavirus dinhi sa rehiyon.
Samtang nagtabang si Mendoza sa PNP Anti-Cyber Unit 10 nga mohimo’g lakang kalabot na sa mga tawo nga gapakatag sa fake news may kalabutan sa novel coronavirus sa social media.
Miingon si Mendoza nga gahatag dugang kakuyaw ug alarma sa publiko ang mga peke nga impormasyon kalabot sa bayrus diha sa Facebook.
Dugtong niini, gi-awhag ni Mendoza ang netizens nga gilayong e-report sa cyber-crime group ang mga tawo nga gapakatag sa peke nga balita aron madakpan ug masilotan.
