CAGAYAN DE ORO CITY – Anaa sa 90 porsiento ang kuwentada sa kampo ni Olympian boxer Carlo Paalam nga masakmit ang kadaugan sa quarterfinals fight batok sa taga-Uzbekistan sa Tokyo Olympics sa Japan ning adlawa.
Kini human pangandami ni coach Elmer Pamisa ang fighting strategy nga ilang buhaton ni Carlo aron pildihon ang 2016 Rio Olympics gold medalist nga si Shakhobidin Zoirov.
Miingon si Pamisa nga si Zoirov ang usa sa ilang gihatagan sa igong pagpangandam tungod sa kanhi record niini.
Kon modaug si Paalam sa maong dula,sigurado na ang bronze medal samtang mo-abante na kini alang sa semi-final rounds.
Una usab niini,miapelar ang hinigugma ni Carlo nga si Stephanie Supelveda sa katawhan nga i-apil sa pag-ampo ang kalampusan sa mga atletang Pinoy nga pabiling nakig-kompetensisya sa Olympics.
Si Stephanie ang varsity usab sa volleyball sa USTP ning syudad.
Samtang bisan si pole vaulter EJ Obiena nangayo’h mga pag-ampo alang gold medal fight sa Tokyo Olympics bid.
Masaksihan ang pole vault event ni Obiena unyang hapon diin malaumon si Obiena nga makakuha ug bulawan nga medalya alang sa Pilipinas.
Pipila sa mga kusog nga makontra sa 25 anyos nga atleta sila Armand Duplantis sa Sweden, Thiago Braz sa Brazil, Piotr Lisek sa Poland ug Renaud Lavillenie sa France, kinsa lakip sa top 10 sa world rankings.
Samtang fighting for gold medal usab si Pinay boxer Neshty Petecio sa women’s featherweight division batok sa pambato sa Japan nga si Sena Irie.
Kasamtangang garantisado na si Petecio sa silver medal apan malaumon kini nga makuha ang bulawan nga medalya sama sa kadaugan ni weightlifter Hidilyn Diaz.
Dali nga gidala sa medical station si Kristina Knott pagkahuman mitabok sa finish line sa 200m-run event sa Tokyo Olympics.
Kini human nakasinati sa ‘heat exhaustion’ ug naglain na ang paminaw sa wala pa nagsugod ang kompetisyon.
Napakyas ang Filipino-American nga makasulod sa semifinals round pagkahuman sa oras nga 23.80 segundos aron matapos ang katapusan sa lima ka mga karibal sa Heat 7.
Nagtapos si Knott sa ika-37 gikan sa 41 nga mga magdadagan sa tanan nga mga ‘heats’.
Sa gymnastics,napakyas si Carlos Yulo sa pagkuha ug medalya human nasakmit ang ika-4 nga pwesto sa men’s vault finals kagabii.
Nakuha ra niya ang average score nga 14.716, mubo alang sa third-place finish.
Mahinumduman si Yulo nakakuha’g spot sa vault final Hulyo 25 apan wala maapil sa floor exercise nga gilauma unta nga makakuha’g medalyang bulawan.
