CAGAYAN DE ORO CITY –Pagka-suspenso sa trabaho ang atubangon sa 97 ka mayor nga pakyas pagtuman sa mando ni Pres Rodrigo Duterte nga nationwide road clearing operation.
Kini human nagbaton sa bagsak nga grado ang tagsa-tagsa ka lugar nga gidumala sa maong mga opisyal.
Miingon si DILG undersecretary Martin Diño nga mopagawas sila sa show cause order aron masukod ang tubag sa dul-ag gatos ka mayores.
Anaa sa 13 ka lugar sa Northern Mindanao ang gihataga’g sa bagsak nga grado nga gilakipan sa Tagoloan, Manticao ug Balingoan sa Misamis Oriental; Manolo Fortich, Baungon, Damulog, ug Sumilao sa Bukidnon; Tagoloan sa Lanao del Norte; ug Mambajao, Sagay, Benoni, Catarman, Guinsiliban sa Camiguin.
Samtang gi-awhag ni Diño ang publiko nga e-report sa ilang buhatan kun ugaling pabilin sila nga makakita sa illegal parking ug sidewalk vendors sa ilang mga lugar.
Gimanduan ni Diño ang katawhan nga kuhaa’g hulagway ang mga illegal parking ug mga sidewalk vendor ug ipadala sa ilang ahensiya.
Gipasalig ni Diño nga siya ang mangunay paghimo’g aksyon batok sa mga opisyal nga pakyas makamintinar sa road clearing.
Una nang gipanganti ni Diño nga mag-atubang sa kasong administrative charges sama sa dereliction of duty and negligence ang mga mayor nga mapakyas mapabalik sa gobyerno ang tanang mga pampublikong dalan nga gigamit alang sa pribadong katuyuan.
