CAGAYAN DE ORO CITY-Gipasigarbo ni PNP regional director C/Supt Agripino Javier ang kakugi sa kapolisan,militar ug katawhan masumpo lamang ang kalihukan sa mga teroristang Maute ilabina dinhi sa syudad.
Kini human nasikop pinasikad sa mando ni Martial Law administrator Defense Sec Delfin Lorenzana ang Maute bomb making expert nga si Mohammed Maute alyas Abu Jadid sa giabangang lawak sa Brgy Macasandig sa syudad kagahapon sa buntag.
Gi-depensa usab ni Javier kon nganong wala masikop sa kapolisan ug militar si Maute samtang daghang road checkpoints nga gipahimutang sa syudad ug lalawigan.
Giangkon usab sa suspected Maute bomb expert nga si Mohammed Maute alyas Abu Jadid nga iyang hulagway ang
napatik sa gipakatag sa local terrorist list sa militar ug kapolisan atubangan sa publiko.
Gibutyag ni PNP regional spokesperson Supt Lemuel Gonda nga hinoon nagdumili si Maute pagkompirmar nga iyang pangalan ang nalatid sa maong listahan sa wanted local terrorists.
Dugang ni Gonda nga nagbaton si Maute sa mga alyas sa Al Majid Mangumpid Romato ug Alfaiz Mamintal nga
iyang gigamit sa mga peke nga MSU-Marawi ID aron makalusot sa checkpoints padulong dinhi sa syudad.
Namugos usab si Maute nga nagsilbi kining Arabic teacher sa usa ka tunghaan nga nakabase sa Brgy Balulang ning syudad.
Samtang namugos si Maute nga bakak ang pasangil nga siya sakop sa teroristang Maute nga nakabase sa Lanao del Sur.
Gibutyag ni Maute nga dili niya binuhatan ang paghimo’g bomba sukwahi sa giakusar sa gobierno batok kaniya.
Giangkon ni Maute nga peke ang ID nga gigamit niini aron dili masitar sa kapolisan ug militar samtang misulod sa syudad gikan sa Marawi City.
Si Maute ang kuyog ni Mohammad Kiram alyas Abdulrahman nga gi-alarma sa kapolisan sa syudad sa miaging semana.
