CAGAYAN DE ORO CITY-Naminusan ang gibating kabalaka sa kapolisan batok terorismo nunot na sa pagka-aresto sa suspected Maute bomb expert sa usa ka boarding house sa Sitio Sta Cruz,Barangay Macasandig ning syudad.
Kini human nagtoo si PNP Regional Director C/Supt Agripino Javier Jr nga adunay plano ang teroristang si Mohammed Noaim Maute nga mohimo’g pagpamomba ning syudad aron ma-divert ang nahitabong kagubot sa Marawi City.
Si Javier miingon nga wala sila’y nakumpiskang nga mga gamit sa pagpamomba apan nagduda sila nga aduna kini kauban nga maoy tigpalit sa mga gamit pamomomba ug sa ubang lugar himoon.
Samtang gipasalamatan ni Javier ang ‘concerned citizen’ nga nagtudlo sa nahimutangan sa teroristang si Maute.
Si Javier miingon nga dili molampos ang kapulisan sa pasikop sa wanted bomber kung wala ang kooperasyon sa publiko.
Dugtong niini, subling nanawagan si Javier sa mga residente sa syudad nga mo-report gilayon sa ilang buhatan kun ugaling adunay mabantayan nga mga kadudahang lihok ilabina nga naa pa sila’y gipangita nga posibleng kauban sa suspek.
