CAGAYAN DE ORO CITY-Napasaka na ang kasong rebellion batok suspek nga bomb maker sa teroristang Maute diha sa Camp Evangelista ning syudad.
Kini human akusahi si Mohammed Maute alyas Abu Jadid nga konektado sa teroristang ISIS-Maute nga utok kagubot sa Marawi City.
Matud ni C/Insp Ariel Philip Pontillas,hepe sa city intelligence unit o CIU sa Cagayan de Oro City Police Office o COCPO nga ipatuman nila ang hugot nga seguridad alang kang Maute ilabina kon i-biyahe na kini sa BJMP-Taguig City.
Si Maute ang pag-umagkon ni financier/adviser Farhata Romata Maute nga inahan usab sa magsoong Omar ug Abdullah nga nakig-engkuwentro sa militar sa Marawi City.
Gi-aktibo sa Martial Law Command Center -Northern Mindanao o MLCC ang Task Force Cagayan de Oro sa syudad.
Gibutyag ni army Col Andres Centino,tigpamaba sa MLCC-Northern Mindanao nga tuyo niini nga masiguro nga masumpo ang tanang bahad nga dala sa terorismo sa dakbayan.
Miingon si Centino nga kaabag sa kapolisan ang militar ingon man ang ubang pwuersa gobierno kontra terorismo.
Kabahin sa nahimo nga resulta sa task force ang pagkasikop ni Maute nga giingong bomb expert sa grupong Maute gikan sa Marawi City.
