CAGAYAN DE ORO CITY- Gipaubos sa pag-imbestigar ang lima ka pamilya nga gilangkuban sa 50 ka tawo tungod sa ilang pagpanguha’g kabtangan nga gipanag-iya sa mga residente nga lumad taga-Marawi City.
Kini human gibitbit sa maong mga sibilyan ang sinako bugas,pagkaon ingon man ang appliances gikan sa mga gipangbiyaan nga mga balay epekto sa giyera sa Marawi City.
Gibutyag sa nagpaila nga pastor nga si Rudy Lungganay nga napugos siya pagkuha sa TV ug washing machine sa iyang anggalon kay duha ka bulan kini nga wala hatagi’g suhulan.
Gani,giakusahan usab nila ang mga sundalo nga maoy naghatag sa ubang kabtangan ngadto sa mga kauban niini.
Samtang gusto sa magtiayong Yusoph ug Saypa De Sumimba nga kasuhan kon ugaling tinood nga nangawat ang gipaubos sa imbestigasyon nga lima ka pamilya sa Lanao del Sur Provincial Capitol.
Kini human nagduda si De Sumimba nga kabahin ang ilang personal nga kabtangan nga gikawat pag-apil sa maong mga sibilyan nga gihatod sa mga sundalo sa kapitol probinsya.
Giangkon ni De Sumimba nga kabahin sa mga nadala sa maong mga sibilyan ang posibleng ila nga kabtangan ilabina nga wala nila madala pagbakwit tungod sa peligro nga maigo sila sa engkuwentro sa mga sundalo batok mga terorista.
Gi-depensahan usab ni De Sumimba ang mga sundalo nga maoy naghatag sa mga kabtangan kay kini nagtoo nga gihimo lamang kini sa maong mga sibilyan aron makalusot sa ilang gihimo.
