CAGAYAN DE ORO CITY-Gikasuhan na sa illegal possession of explosives sa CIDG-10 ang duha sa ka miembro sa teroristang Maute-ISIS nga nasikop sa Martial Law- Special Action Group o ML-SAG sa Sitio Aluba, Brgy Macasandig ning syudad sa miaging kadlawon.
Kini human nakuhaa’g upat ka bala sa M203 grenades ug laing kagamitan paghimo’g bomba sa gisak-an nila nga boarding house sa maong lugar.
Gibutyag ni ML-SAG member CIDG deputy director for operations head Supt Melgar Devaras nga maoy ilang gikasuhan sila si Monaliza Romato ug Tahera Romato Taher.
Gibutyag ni Devaras nga isunod nila ang pagkaso sa mga suspek sa rebellion kon may makuha sila nga mga testigo ug ebedensiya nga magduot batok sa maong mga dinakpan.
Una niini,gitinguha sa ML-SAG ang pagsikop sa Maute-ISIS group financier nga si Irene Romato Idris apan nakasibat kini atol sa ilang pagronda sa maong boarding house.
