CAGAYAN DE ORO CITY- Gitunulan sa dugang ayuda ang kapi’g gatos ka sundalo nga samaron gikan sa Marawi City nga naka-confine sa Camp Evangelista Station Hospital sa Brgy Patag ning syudad.
Kini human gi-divert sa mga lumilihok sa MisOr Cares ang pondo nga alang sa ilang anibersaryo sa pagpamalit sa medical needs sa mga sundalo sa maong kampo.
Gibutyag ni Misamis Oriental Gov Bambi Emano nga inay magkatigom ang mga trabahante sa MisOr Cares gihatag na lamang nila sa mga sundalo ang ilang gamay’ng pondo alang unta sa ikatulong tuig nga anibersaryo niini.
Samtang nadasig pa ang mga sundalo sa ilang tahas nga tapuson ang pagpuhag sa nabiling mga terorista sa Marawi City.
Kini human natandog ang kasundaluhan nga giduaw sa gobiernong probinsyal ug gihatagan sa pipila ka panginahanglan nila samtang nagpaalim sa mga samad sa Camp Evangelista Station Hospital.
Gibutyag ni 4th ID spokesperson Capt Joe Patrick Martinez nga natandog sila sa gipakita nga pag-tabang kanila sa representante sa katawhan gikan sa lalawigan.
