CAGAYAN DE ORO CITY-Mawad-an na sa kusog ug pokus ang nabiling sakop sa mga teroristang Maute-ISIS nga padayong nakig-engkuwentro sa militar sulod sa main battle area sa Marawi City.
Kini ang kampante nga pahayag ni AFP Western Mindanao Command commander Maj Gen Carlito Galvez Jr tungod sa lig-ong basehan nga napatay na nila si Abdullah Maute atol sa airstrike.
Gawas kang Abdullah,napatay usab sa govt forces ang igsoon niini nga si Madi samtang samaron si Omar Maute kinsa gihata’g proteksyon ni Abu Sayyaf Group leader Isnilon Hapilon sulod sa war zone.
Dugtong niini, paningkamutan ni AFP Chief General Eduardo Año sa militar nga matapos na ang kagubot sa Marawi City sa dili pa ang adlaw sa iyang pagretiro sa Oktobre 27 ning tuiga.
Kumpiyansa si Año nga duol na makontrolar sa miliar ang nagkagamay nga luna nga gi-ukopahan sa Maute-ISIS group.
Namugos si Año nga anaa na sa “final phase” ang pakig-giyera sa militar batok sa mga terorista sa Marawi City.
Gitinguha usab sa AFP nga ma-angkon ang usa ka tulay nga nahimutang sa Raya Madaya kinsa nailang “Masiu bridge”.
Natala na ang kapi’g 800 ka kinabuhi ang nakalas diin kadaghanan niini mga terorista sulod sa kapi’g tulo ka bulan nga giyera sa Marawi City.
