CAGAYAN DE ORO CITY-Gipanganti ni Philippine Drug Enforcement Agency regional director Willkins Villanueva nga dugang high value targets o shabu pushers ug user nga konektado sa gobierno nga masikop ning tuiga.
Gihimo ni Villanueva ang panganti nunot sa pagkasikop ni Department of Agrarian Reform o DAR-Misamis Oriental chief legal officer Atty Mario Jay Peilago nga aktong nasapon nga naggamit sa gitoohang shabu sa pinuy-anan niini sa Brgy Kauswagan ning syudad kagahapon sa buntag.
Miingon si Villanueva nga dili na makamahay ang publiko sa gihatag nga panahon ni Pres Rodrigo Duterte aron sila magbag-o hinungdan sikopon na nila kadtong nagpadayong mikontra sa balaod.
Una niini, giangkon ni Pielago nga tiggamitan kini sa gidiling droga apan kusganong nagdumili pag-angkon nga siya ang tag-iya sa 15 gramos nga suspected shabu nga nakompiskar gikan sa pinuy-anan niini kagahapon sa buntag.
Samtang gi-depensa sa mismong kapikas ni Peilago nga matarong nga klase sa pagka-amahan kini sa ilang mga anak.
Kini human unang miabot sa atensyon ni DAR regional director Faisal Mambuay nga nalambigit sa giingong paggamit sa gidiling droga si Peilago.
Miingon si Mambuay nga rason kini nga gi-kompronta niini sa magkalahing higayon ang magtiayong Peilago aron pangayuan sa ilang panig batok sa isyu.
Gani, gisulti pa sa kapikas sa suspek nga laraw na unta nila nga mopuyo nga malinawon didto sa Amerika aron kalikayan ang dili maayong isyu batok kanila.
Dugtong niini, nag-positibo ang chief legal officer sa DAR-MisOr sa paggamit sa gidiling droga partikular ang shabu.
Kini subay sa gihimong pag-examine sa PDEA-Crime Lab nga mihiling kang Peilago dihang nasikop siya sa PDEA-10 ug PNP sa iyang pinuy-anan kagahapon.
Miingon si PDEA agent Ben Calibre nga una nila nga nasapon si Peilago nga akto naggamit sa shabu dihang nasulod ang pinuy-anan niini sa maong lugar.
Sa pagka karon gikasuhan na sa PDEA-10 si Peilago sa patung-patong nga kasupakan sa mga probisyon sa Dangerous Drugs Act of 2002 o Republic Act 9165.
Miingon si PDEA agent Ben Calibre nga tinguhaon nila nga mahuman ang pagduso’g kaso batok Peilago aron kini masaka sa city jail ning syudad.
