CAGAYAN DE ORO CITY-I-panawagan atol sa himoong Parada-Protesta sa Associated Labor Unions-Trade Union Congress of the Philippines ang taas nga suhulan alang sa mumumuo sa Labor Day ugmang adlawa.
Matud ni Nick Borja, kinsa regional vice president sa ALU-TUCP Northern Mindanao nga kinahanglang himoon na sa dul-ag usa ka libo ka pesos ang suholan sa mga mamumuo ilabina nga mimahal na ang palaliton tungod sa TRAIN Law.
Gawas niini ila usab ipanawagan ang may kalabutan sa labor-only contracting sa mga kompanya.
Gibutyag usab ni Borja nga daut na ang kredibilidad ni Pres Rodrigo Duterte sa mga mamumuo.
Siya miingon nga nadaut ang maayo nga record ni Pres Duterte sa mga trabahante tungod sa wala pagpirma niini sa “endo”, butang nga gimahayan sa pipila ka grupo.
Andam na usab ang mga grupo nga mohimo’g parada-protesta gikan sa Rotonda, Brgy Macasandig padulong Kiosko, Divisoria ning syudad ugmang adlawa.
