CAGAYAN DE ORO CITY-Gihimakak sa kapolisan nga presyur sila tungod sa gimando nga ‘quota’ sa ilang kadagkuan aron mohimo’g mga anti-illegal drug buy bust operations diin mag-resulta sa kamatayon sa mga target suspect dinhi sa rehiyon.
Kini human tulo ka suspected shabu pushers ang napatay sa kapolisan kay giingong misukol dihang natigayon ang mga trasanction sulod lamang ning semanaha.
Miingon si Cagayan de Oro City Police Office spokesperson Supt Mardy Hortillosa nga kanunay nila gitahod ang bili sa kinabuhi sa tawo hinungdan naningkamot sila masikop nga buhi ang suspected drug pushers.
Gihimo ni Hortillosa ang katin-awan nunot sa kamatayon sa suspected drug pusher nga si Abdul Wahab,minyo nga taga- Marawi City dihang giingong misukol sa kapolisan sa giabangan niining balay sa Carinugan,Brgy Balulang kagahapon sa hapon.
Samtang giangkon sa anak sa napatay’ng suspected drug pusher nga napatay sa kapolisan nga tigbaligyaan ug tiggamitan sa shabu ang amahan niini nga si Wahab diha sa Brgy Balulang sa syudad.
Kini human mihimo’g operasyon ang City Drugs Enforcement Unit o CDEU batok Wahab diin nag-resulta sa dugu-ong hitabo.
Miingon si Hamid Wahab nga wala sila masayod sa pasangil sa kapolisan apan aminado usab kini nga pinangita ang iyang amahan.
Naigo sa nagkadaiyang bahin sa lawas ang suspek dihang napusilan sa kapolisan hinungdan sa kamaayon niini.
Narekober sa crime scene ang suspected shabu,usa ka libo nga salapi,38 kalibre nga armas ug granada.
Samtang itugyan sa COCPO ang mga personahe sa City Drug Enforcement Unit ug City Intelligence Branch o CIB aron imbestigaran sa kamatayon sa drug pusher suspect sa Brgy Balulang sa syudad.
Kini human napatay ang suspek nga si Abdul Wahab kay giingong misukol samtang naglusad sa buy bust operation ang CDEU diin dunay nahitabo nga pinusilay.
Miingon si Hortillosa nga trabaho sa PNP’s Internal Affairs Service nga mohimo’g imbestigasyon batok sa mga pulis nga dunay napatay atol sa mga drug buy bust operation.
Apan namugos si Hortillosa nga wala sila’y angay kabalak-an kay pulos nanukol ang duha ka suspected pushers nga napatay sa CDEU sulod na sa sunod-sunod nga semana ning syudad.
Dumduman nga napatay usab sa magkalahing operasyon ang suspected pushers nga si Michael Datu sa Iligan City ug Bayani Abasola sa Tagoloan,Misamis Oriental kay giingong pulos misukol sa kapolisan.
