CAGAYAN DE ORO CITY-Ikatag sa PNP Autonomous Region in Muslim Mindanao o ARMM ang libo ka pulis sa bisinidad sa Marawi City epektibo ning semanaha.
Kini aron paghatag seguridad sa mga residente nga laraw mopapipil sa special elections sa brgy ug Sangguniang Kabataan o SK elections sa Setyembre 22 ning tuiga.
Miingon si PNP-ARMM regional director C/Supt Graciano Mejares nga kuyog sa militar, ikapaniguro nila nga mahatagan sa seguridad ang pagpahigayon sa brgy ug SK elections sa maong syudad.
Partikular nga hataga’g seguridad sa PNP ug AFP ang 24 ka brgy nga grabeng apektado sa gubat tali gobiernong puwersa ug teroristang Maute-ISIS kapin tuig na ang nakalabay.
Samtang gi-pursigido pa gihapon sa militar ang grupo ni Maute-ISIS sub-commander Benito Marahomsar alyas Abu Dar nga dakong bahad sa seguridad sa Marawi City ug Lanao del Sur.
Miingon si Mejares nga gibasehan nila sa security preparation sa pagbantay sa Brgy ug SK elections ang dala nga bahad sa pundok ni Abu Dar.
Dugang ni Mejares nga hinoon, wala sila’y brgy nga gi-monitor nga dunay init nga bangi sa politika ilabina nga kanhi nag-atubang sa dakong giyera ang Marawi City tungod sa pagpangatake sa teroristang Maute-ISIS sa tuig 2017.
