CAGAYAN DE ORO CITY-Nasunog ang tulo ka andana nga gipanag-iyahan sa pamilyang Gales sa Purok 2,Brgy Kauswagan ning syudad kagahapon sa hapon.
Gibasol ni Misamis Oriental provincial employee Engr Tessie Gales nga ang nag-kalayo nga electric wires ang hinungan sa pagkasunog sa ilang pinuy-anan.
Hinoon,nagpasalamat ang pamilyang Gales kay pulos luwas ang ilang mga sakop ingon man ang mga binuhi nila nga mananap.
Gibutyag ni Gales nga anaa sa 5 milyon pesos ang inisyal nga damyos sa pagkasunog sa maong balay ug kabtangan sa maong pamilya.
Samtang gi-depensa ang Bureau of Fire Protection kon nganong napakyas ang paspas nga pagpalong sa pagkasunog sa three storey house sa pamilyang Gales sa Brgy Kauswagan sa syudad.
Gibutyag ni BFP ground commander Fire/Insp Willy Tan nga dali naka-responde ang mga bombero apan naglisod sila pagsulod kay gagmay ang dalan padulong sa nasunog nga pinuy-anan.
Miingon si Tan nga gisumpay sumpay na lamang ang ilang hose tungod kay dili naman makasulod ang firetrucks sa maong dapit.
Hinoon, walay nay na-angol nga mga silingang balay human sa insidente. Natala ang inisyal nga 2.7 milyon pesos nga structural damage sa maong sunog.
