CAGAYAN DE ORO CITY-Gikompirmar sa PNP-10 nga dul-ag 90 ka suspected drug pushers na ang napatay sa gilusad nila nga anti-illegal drug operations sukad gimando ni Pres Rodrigo Duterte dinhi sa rehiyon.
Miingon si PNP regional spokesperson Supt Surki Serenias nga maoy labing daghan nga dunay napatay nga suspected pushers kay giingong nanukol sa police operations ang bulan sa Agosto diin mitala sa 25 ka kaso.
Dugang ni Serenias nga bisan sila ang mibati’g kaalarma kon nganong dunay gakamatay sa halos matag-lusad sa operasyon diin nag-una niini ang Misamis Oriental.
Samtang uuon si Gov Bambi Emano nga ipatawag sa Sangguniang Panlalawigan o SP ang liderato ni PNP provincial director Sr/Supt Rolando Destura aron mo-esplikar kon nganong taas ang kaso sa mga napatay nga suspected pushers sa Misamis Oriental.
Kini human gikompirmar sa PNP-10 nga anaa sa 11 ka tawo ang napatay sukad gisugdan ang war against illegal drugs diin wala pa’y labot niini ang bulan sa Setyembre ning tuiga.
Miingon si Emano nga suportado niya ang kampanya sa kapolisan kay nagpasabot kini nga may pipila ka tawo pa nga wala mosunod sa mando ni Pres Rodrigo Duterte nga mohunong na sa illegal nga kalihukan sa lalawigan.
Samtang dili na angay ibalik pa ni Regional Peace and Order Council chairman City Mayor Oscar Moreno ang iyang baruganan kabahin sa isyu sa summary execution o extra judicial killings.
Kini maoy reaksyon ni Moreno kabahin sa subli niya nga pagbati sa iyang kusganong pagsupak sa pagpamatay sa suspected drug pushers sa police operations ilabina kon walay basehan.
Miingon si Moreno nga kon kalikayan nga mapatay ang mga target drug pusher personalities angay nga himoon kini sa kapolisan apan kon nagdala na usab sa peligro wala na’y mahimo ang estado gawas sa pag-neutralize niini.
Mismo dinhi sa syudad,tulo ka suspected pushers ang napatay sa kapolisan tungod sa isyu sa pagsukol atol sa gihimo nga operasyon sa Agosto ning tuiga.
