CAGAYAN DE ORO CITY-Gihagit ni Regional Peace and Order Council chairman City Mayor Oscar Moreno ang publiko nga dili mahadlok sa tulo ka pagpamomba natigayon sa Region 12 sulod Setyembre ning tuiga.
Kini human naangol ang walo ka sibilyan dihang mibusikad ang improvised explosive device o IED nga hinimuan sa giingong mga terorista sa General Santos City ning semanaha.
Miingon si Moreno nga magtagbo ang RPOC members aron matuki ang laing mga paagi kon unsaon nga mapugngan ang mga pagpamomba nga sunod-sunod nang nahitabo sa ubang bahin sa Mindanao dinhi sa rehiyon.
Makita mismo dinhi sa syudad,kon unsa kahugot ang seguridad tungod sa gikatag nga kapolisan sa nagkadaiyang kadalanan adlaw ug gabii.
Samtang gihugtan pa sa kapolisan kauban ang militar ang paglusad sa road checkpoints sa entrance ug exit area nga sakop sa Misamis Oriental.
Kini isip kabahin sa security measures nga gipatuman aron dali masikop ang mga tawo nga tuyo mosabwag kagubot sa lalawigan ug ilabina dinhi sa syudad.
Miingon si Gov Bambi Emano nga gilayon niya gitigom ang Provincial Peace and Order Council o PPOC aron ituki ang mga paagi nga makahatag proteksyon sa publiko bisan kakulang sa mga personahe sa kapolisan sa lalawigan.
Samtang subli gihupay sa kapolisan ug militar ang gibating kabalaka sa publiko batok sa mga pagpamomba sa mga terorista sa pipila ka bahin sa Mindanao.
Miingon si PNP regional spokesperson Supt Surki Serenias nga anaa sa kontrol sa sitwasyon ang gobierno apan nangayo sila’g tabang gikan sa katawhan.
Kini ang hinungdan nga subli gipaubos sa full alert status ni PNP regional director C/Supt Timoteo Pacleb ang seguridad sa rehiyon masiguro lamang ang kaluwasan sa katawhan ilabina sa pampublikong mga lugar.
