CAGAYAN DE ORO CITY-Gihimakak sa Bureau of Customs o BoC Northern Mindanao nga dunay pagtago sa mga bugas sulod mismo sa Mindanao International Container Terminal o MICT sa Tagoloan,Misamis Oriental.
Kini bisan nga unang gimando ni Customs Commissioner Isidro Lapenia nga e-prioridad nga ipagawas ang mga kargamento kon bugas ang mga sulod niini aron paspas magamit sa publiko.
Gihimo ni BoC-Northern Mindanao deputy collector Marvin Mison ang katin-awan dihang unang gisusi sa NBI-10 ang MICT diin nadiskobre ang sinakong mga bugas nga iya sa pribadong grupo dinhi sa rehiyon.
Namugos si Mison nga dili tinuyo ang pagkalangan sa pag-release sa bugas apan gumikan kini sa kakuti sa proseso subay sa mando usab sa ilang kadagkuan sa BoC-Manila.
