CAGAYAN DE ORO CITY-Gikasuhan na sa PNP-10 ang duha ka mga pulis nga gireklamo nga nangilkil sa usa ka checkpoint sa Iligan City.
Matud ni PNP-10 spokesperson Supt Surki Serenias nga dili nila pasagdan ang maong illegal nga binuhatan hinungdan nga gilangkat na sa serbisyo ang maong mga pulis.
Naglaum si Serenias nga magsilbi kining leksyon sa ubang mga police nga likayan ang mga illegal nga aktibidadis.
Samtang gihatagag katin-awan ni Serenias nga wala sila makadawat sa reklamo may kalabutan sa “sexual harrasment” nga gakahitabo sa pipila ka PNP checkpoints kon babaye ang irekisa sa tibook rehiyon.
Si Serenias miingon nga maoy sagad nga reklamo ilang gakadawatan mao nga malangan ang mga residente sa ilang mga lakaw ug trabaho.
Gani, nakadawat usab sila’g reklamo batok sa mga bag-ong pulis nga nagdumili pagresponde sa usa ka aksidente.
Gimando na usab sa Cagayan de Oro City Police Office nga pahugtan pa ang pagpatuman sa checkpoint sa tibook syudad.
Kini bisan paman nga dunay reklamo nga “sexual harrasment” nga gakahitabo sa pipila ka PNP checkpoints kon babaye ang irekisa.
Matud ni COCPO spokesperson Supt Mardi Hortillosa nga kinahanglang pahugtan ang seguridad sa syudad batok sa bahad sa pagpamomba sa mga terorista.
