CAGAYAN DE ORO CITY-I-apelar ni PDEA regional director Wilkins Villanueva ang pagbasura sa korte sa kasong illegal drugs nga giatubang ni kanhi Maguing Mayor Johaira Abinal Macabuat alyas Marimar nga unang nasikop sa syudad Hulyo 2016.
Kini human gi-abswelto ang kaso gumikan sa ilegal nga search operations diin nakuhaa’g gatos gramos nga shabu ug mga armas sa ilang pinuy-anan sa Brgy Kauswagan sa syudad.
Miingon si Villanueva nga makaapelar pa sila kang Regional Trial Court Presiding Judge Jeoffrey Acebedo hinungdan himoon nila kini sa labing dali nga panahon.
Una nang gibutyag ni Atty. Dick Carlo Cabanlas, clerk of Court sa Hall of Justice nga napakyas ang prosecution sa pag-establisar sa pagmatood nga legal ang operasyon batok Marimar hinungdan nabasura ang kaso.
Kabahin sa gimando nga pagbuhian ang bana ni Marimar nga si Army Maj Suharto Macabuat ingon man sila si Kate Abinal, 22; Noraisa Sarip, 34; Mark Gerald Sindac, 33; Moamar Taher, 28; Mariano Dagandar Jr., 54; Manot Dutoan, 20 ug Hezam Tambidan, 21 nga anaa sulod sa balay dihang gilusad ang search warrant operations.
