CAGAYAN DE ORO CITY-Moabot sa 16 ka samad tinigbasan ug dinunggaban ang naangkon sa mag-ig-agaw human gipatay sa wala mailang mga suspek sa Purok 7, Upper Puerto ning syudad.
Giila ang mga namatay nga sila si Elesio Balatero Jr ug Arnold Buray, pulos nagpuyo sa Mantibugao, Manolo Fortich Bukidnon samtang samaran ang kauban niini nga si Rodel Librea.
Matud ni Scene of the Crime Operatives o SOCO medico legal officer Dr. Christian Caballes nga nakaangkon sa dakong samad sa dagway ug 9 ka dinunggaban ang biktima nga si Buray samtang 6 ka stabbing wounds kang Balatero.
Nagtoo si Puerto Police Station commander C/Insp Evan Viñas nga gi-atangan sa mga suspek ang mga namatay nga biktima.
Siya miingon nga may nahitabo pa nga komosyon ayha gipanigbas-patay ang mag-ig-agaw nga sila si Balatero ug Buray samtang samaran ang usa ka Librea.
Sutaon ni Viñas kon asa gikan ang mga biktima.
Giangkon ni Viñas nga maglisod sila sa pagtumbok sa mga suspek.
Matud ni Viñas nga si Librea maoy bugtong makatug-an kung kinsa ang mga suspek sa krimen ilabina nga walay nailhan nga kaaway ang pamilya sa mga namatay.
Samtang walay kasayuran ang inahan nga si Gemma Librea kung adunay kaaway ang iyang anak nga naangol sa pagpanigbas.
Matud ni Librea nga nananghid ang iyang anak nga mamista ug wala siya magdahom nga madunggaban kini sa wala mailang mga suspek.
