CAGAYAN DE ORO CITY-Selos ang gilantaw nga anggulo sa kapolisan sa pag-tigbas patay sa duha ka tawo samtang usa ang angol diha sa Purok 7, Upper Puerto ning syudad.
Matud ni Puerto Police Station commander C/Insp Evan Viñas nga ilang gibalikan ang bar nga giimnan sa mga namatay nga sila si Elesio Balatero Jr ug Arnold Buray, pulos nagpuyo sa Mantibugao, Manolo Fortich Bukidnon.
Nasuta nga nakaaway niini ang bana sa nakauban nilang babaye sa maong bar.
Apan, gipanganti ni Viñas nga ila pang palawman ang imbestigasyon sa kaso ug hulaton nga makatubag sa pangutana ang naangol nga si Rodel Librea.
Kahinumduman nga moabot sa 16 ka samad tinigbasan ug dinunggaban ang naangkon sa mag-ig-agaw human gipatay sa wala mailang mga suspek.
