CAGAYAN DE ORO CITY-Gipangayo sa Road and Traffic Administration ang tabang sa matag barangay sa pagpatuman sa mando sa Department of Interior and Local Government nga i-regulate ang mga motorela, motorsikad ug uban pa sa mga national highways.
Matud ni RTA head for operations Carmelito Deloso nga maglisod sila sa pagpatuman sa maong kamanduan kung wala ang tabang sa mga hingtungdan ahensya ilabina nga gamay lamang ang ilang personalidad ug daghan usab ang ilang trabaho.
Gitin-aw usab ni COCPO spokesperson Supt Mardi Hortillosa nga andam motabang ang kapulisan sa pagpatuman sa mando sa DILG.
Apan, giklaro ni Hortillosa nga dili nila kini priority ilabina nga ang PNP gitahasan usab sa pagpangdakop sa mga kriminal ug sa mga nalambigit sa illegal nga droga.
Maoy mahatag sa kapulisan sa RTA ang suporta sa maong kamanduan.
Samtang nangayo’g pasaylo si Deloso sa mga madakpan nga motorela, motorsikad nga mosupak sa mando.
Siya miingon nga seguradong mawad-an sila sa panginabuhian apan maoy mahinungdanon nga dili mabutang sa peligro ang ilang kinabuhi.
Asoy pa ni Deloso nga gihimo kini sa ahensiya alang usab sa kaluwasan sa seguridad sa mga drayber sa motorela ug motorsikad.
Hisayran nga sagad gakahitabo sa mga national highways ang aksidente sa motorela, motorsikad batok na sa mga dagkong trak.
