CAGAYAN DE ORO CITY-Suportado ug gi-depensa sa Integrated Bar of the Philippines – Misamis Oriental chapter ang hukom ni RTC Branch 41 Judge Joeffrey Acebido pag-acquit kang” Mindanao shabu queen” si Johaira “Marimar” Macabuat.
Kini human unang miani’g pagsaway si Acebido kon nganong gipabuhian si Marimar bisan sa kalig-on sa ebedensiya nga gihuptan sa PDEA-10.
Miingon si IBP-Misamis Oriental chapter president Atty Ed Cuaresma nga gi-base ni Acebido sa konstitusyon ang hukom niini sa kaso ni Macabuat kay napakyas ang prosekusyon pag-esplikar kon nganong wala masubay ang procedure sa paglusad sa search operation.
Si Macabuat kinsa dul-ag 20 ka tuig nang naglihok sa ilegal nga droga kuyog ang laing siyam ka sakop ang gidakop sa PDEA-10 sulod sa ilang pinuy-anan sa Brgy Kauswagan sa syudad tuig 2016.
Samtang gilaraw sa mga huwes nga kasuhan sa libel ug oral defamation ang tanan midagmal sa pagkatawo ni Acebido human niya pabuhi si Macabuat.
Dugang ni Cuaresma nga wala yaga-yaga-i sa korte ang ilang gihawiran nga kaso tungod kay usa ka dekalibre ug respetadong huwes ang nagpakanaug sa desisyon base sa kapakyasan sa mga nag-file sa kaso.
Gitumbok ni Cuaresma nga “fruits of a poisonous tree” ang gipakitang procedural lapses sa mga otoridad batok sa dinakpan.
