CAGAYAN DE ORO CITY-Gihupay sa Cagayan de Oro City Police Office o COCPO nga dili mahimong ‘killing field’ ang dakbayan gumikan sa gilusad nga war on drugs batok sa mga tigpayuhot sa gidiling droga.
Pasalig kini ni COCPO spokesperson Supt Mardi Hortillosa dihang napulo ka suspected drug pushers na ang napatay sa police operations sa syudad gikan Agosto hangtod Oktubre ning tuiga.
Miingon si Hortillosa nga kon dili lamang magpakita’g pagsukol ang mga target nga suspected pushers,dili usab sila mabutang sa pagka-disgrasya.
Ang grupo ni Puerto Police Station commander C/Insp Evan Vinias ang pinakaulahi nakahimo’g operasyon diin napatay si Geovanni Nazareno nga nagpuyo sa Brgy 35 dihang gipaubos sa operasyon sa Brgy Agusan ning syudad sa miaging gabii.
Samtang gihulat sa komitiba sa police,fire and public safety ang mga pamilya sa napatay’ng suspected drug pushers nga modangop kanila kon gusto nila managayo’g tabang ning syudad.
Kini ang garantiya ni Kag Romeo Calizo,chairman sa maong komitiba gumikan sa napulo ka tawo ang napatay sa PNP operations sa war on drugs sa dakbayan.
Miingon si Calizo nga andam sila motabang kon dunay modangop nga kabanay sa mga suspected pusher nga mangayo’g hustisya gumikan sa hitabo.
Sa pagkakaron,wala pa’y nangahas pagdalikyat sa ilang buhatan sa city council sa dakbayan.
