CAGAYAN DE ORO CITY-Gibatikos ni City Police Director Sr/Supt Nelson Aganon ang pipila ka sakop sa prensa tungod sa gipamugos nga dunay natigayon nga extra judicial killlings sa dakbayan.
Kini nunot sa gipakusog nga anti-illegal drugs operations diin anaa na sa 10 ka suspected pushers ang napatay gikan Agosto hangtod Oktubre ning tuiga.
Miingon si Aganon nga mas maayo nga mokuyog ang sakop sa prensa mismo sa operasyon aron mabati nila ang peligro nga makig-atubang sa mga targe nga makig-pinusilay sa kapolisan.
Una nang namugos si Aganon nga dili binuhatan sa iyang mga pulis nga pamatyon ang drug pushers ilabina kon dili mopakita sa pagsukol.
Samtang magtigom ang mga abogado sa syudad ug lalawigan aron tukion ang sunod-sunod nga kamatayon sa suspected pushers dinhi sa rehiyon.
Kini human mibati’g kaalarma ang Intergrated Bar of the Philippines Misamis Oriental chapter sa kapi’g gatos ka tawo na ang napatay sa anti-illegal drugs operations sa kapolisan sa rehiyon.
Miingon si IBP-Misamis Oriental chapter president Atty Ed Cuaresma nga unta likayan sa katawhan nga magpagapos sa ilegal nga droga aron dili kini mabutang sa peligro ang mga kinabuhi niini.
