CAGAYAN DE ORO CITY-Nakagawas na sa ospital ang tulo ka pulis nga na-angol sa pagbusikad sa granada nga gilabay sa rebeldeng NPA sa headquarters sa 1003rd Mobile Force sa Brgy Jalapitan Purok-1 San Fernando, Bukidnon.
Gikompirmar ni PNP regional spokesperson Supt Surki Serenias nga luwas nga nakagawas sa hospital sa Valencia sila PO2 Anna Marie Suan, PO1 Marken Tan ug PO1 Amor Binay-an.
Una niini, gi-angkon ni Serenias nga nagdumili sila’g butyag sa identity sa tulo ka pulis atol sa pagka hitabo aron dili magpanic ang ilang mga pamilya.
Samtang Pugngan sa PNP-10 ang posibleng pagpangatake sa rebeldeng New People’s Army ilabina sa Bukidnon.
Miingon si Serenias nga gipatuman na ang mas hugot nga checkpoint aron madakpan ang mga responsable paglabay sa granada.
Gitug-an ni Serenias nga naila na nila ang usa sa mga suspek ug gikan kini sa NPA nga naglihok sa maong dapit.
Laraw kasuhan sa PNP ang mga suspek gumikan sa nahitabo sa ilang kauban sa miaging gabii.
