CAGAYAN DE ORO CITY-Pahamtanga’g suspension sa business permit ang kompanyang LBC Express Incorporated kon padayong magmagahi pagbaton sa kaugalingong guwardiya sa ilang mga operasyon ning syudad.
Kini ang panganti sa komitiba sa trade and commerce ug police,fire and public safety gumikan sa sunod-
sunod nga tulis sa LBC branches sa syudad.
Miingon si Kag George Goking,chairman sa trade and commerce committee nga dili sila magpanuko paghimo niini kon pabiling magdumili ang LBC nga ipalig-on ang ilang seguridad batok sa mga tulisan.
Samtang namugos usab si LBC regional area manager Jacinto Bernados nga gisunod nila ang
gabayan nga gimando sa syudad.
Miingon si Bernados nga kon kini usab ang mahukman sa konseho,gilayon kini isaka sa ilang national office alang sa tukma nga aksyon.
Samtang gi-sermonan ni Kag Romeo Calizo ang kadagkuan sa LBC Express Incorporated sa pagpasagad sa seguridad sa ilang mga patigayon hinungdan dali masudlan sa grupo sa mga tulisan.
Kini human ulahing gitulis sa Bedro Robbery Group ang LBC-Velez Branch diin 110-mil pesos nga salapi ang nadala ning syudad sa miaging adlaw’ng Domingo.
Gihimo ni Calizo kinsa chairman sa komitiba sa police,fire and public safety ang pahayag gumikan sa dili konkreto nga aksyon sa LBC management bisan kadaghana gitulis sa syudad man o lalawigan.
Namugos usab si Bernados nga duna sila’y kaugalingong security measures batok mga tulisan.
Samtang nag-atubang sa kasong tulis,illegal possession of explosives ug paghupot sa ilegal nga droga ang mga suspek pagtulis sa LBC-Velez Branch sa piskalya ning syudad.
Kini human kasuhi sa kapolisan ang dinakpan nga si Roosevelt Bedro alyas Pablo ug ang nakasibat nga si Archolito Palubon alyas Bingkol gumikan sa maong hitabo ning syudad.
Si City Police Director Sr/Supt Nelson Aganon miingon nga positibong gitudlo sa mga empleyado sa LBC ang mga suspek hinungdan nga nadakpan si Bedro.
Gitumbok ni Aganon nga ang Bedro Robbery Group gikan sa Ozamiz City usab ang mitulis sa branch sa LBC sa Brgy Carmen ug Tagoloan,Misamis Oriental sa naglabay’ng mga bulan.
Una nanng gipanghimakak sa nadakpang suspek nga si Bedro nga kabahin siya sa nanulis sa pipila ka LBC branches ning syudad ug lalawigan.
Gibutyag ni Bedro nga wala siya sukad nakauban sa pagpanulis apan giangkon niini nga kabahin siya sa Tokhang
surrenderee diha sa Buara,Brgy Bayabas ning syudad.
Dugang pa ni Bedro nga kaila siya ni Archolito Palubon alyas Bingkol tungod kay iya kining silingan ning syudad.
Asoy niini nga nabuhi siya sa trabaho isip dispatcher sa terminal sukwahi sa pasangil nga kini nalambigit sa pagpanulis.
