CAGAYAN DE ORO CITY-Napatay sa kapolisan ang ika-dose nga suspected drug pusher dihang giingong misukol samtang gihimo ang drug buy bust operation sa Sitio Balacanas,Brgy Consolacion ning syudad kagabii.
Giila ang suspek nga si Jeremy Paderan,24 anyos,may kaipon ug walay klaro nga address ning syudad.
Gibutyag ni Macabalan Police Station commander Sr/Insp Jack Lanitan nga nagsakay sa motorsiklo si Paderan uban sa wala mailhing driver, apan naka-bantay ang driver sa presensya sa mga pulis hinungdan nga dali kining misibat hinungdan nabiyaan ang target.
Gamit ang iyang 38 revolver kalit namusil si Paderan sa mga pulis hinungdan nga gibaslan kini sa mga operatiba nga miresulta sa pagka igo sa suspek.
Samtang dili makapasalig ang Cagayan de Oro Police Office nga dili na madungagan ang ihap sa mga tigpayuhot sa gidiling droga nga mamatay sa drug buy bust operation sa kapolisan ning syudad.
Gibutyag ni Cagayan de Oro Police Office spokesperson Supt Mardi Hortillosa nga kon dili lamang gayud mosukol ang mga drug pusher sa operatiba sigurado nga wala usay mamatay.
Dugang ni Hortillosa nga wala nila gikonsidera nga alarming ang pagkamatay sa 12 ka drug suspects sa syudad gumikan kay sa gatusan nila nga operasyon gamay lamang niini ang misangpot sa duguon.
