CAGAYAN DE ORO CITY-Wala angkona sa PNP-10 nga binuhatan sa kapolisan ang pag-salvage patay sa tulo ka batan-ong lalaki diha sa Brgy Sta Inis,Malitbog,Bukidnon sa kadlawon sa adlaw’ng Lunes.
Kini bisan nagduda ang pamilya sa mga biktima nga sila si Clifford Abales, 21-anyos,residente sa Tagoloan; Vicente Viemen, 24-anyos ug Don Greymar Andales,23-anyos nga pulos taga Villanueva,Misamis Oriental.
Gibutyag ni PNP regional spokesperson Supt Surki Serenias nga dili mahitabo nga ang kauban nila nga pulis ang mipatay sa tulo ka biktima kay walay gitugutan nga mohimo niini.
Kini ang hinungdan nga gimanduan ni PNP regional spokesperson C/Supt Timoteo Pacleb ang provincial command sa Misamis Oriental PNP nga imbestigaran ang hitabo ilabina nga ulahi nga nakit-an ang mga biktima nga giimbestigaran sa kapolisan sa Tagoloan Police Station sa miaging adlaw’ng Dominggo sa gabii.
Samtang giiimbestigaran gihapon sa Tagoloan Police Station ang kamatayon sa tulo ka batan-ong lalaki nga kanhi nila giimbestigar tungod sa pasangil nga nanglabni’g celphone sa usa sa brgy sa maong lungsod sa miaging semana.
Gihimo ni Tagoloan Police Station commander C/Insp Allan Oniana ang lakang human sila dudahi nga sila ang mihimo sa pagpapatay sa mga biktima.
Gibutyag ni Oniana nga wala na sa ilang kontrol ang seguridad sa mga biktima dihang gipapauli na nial kini human sa imbestigasyon.
Napalgan ang patay’ng lawas sa mga biktima sa pangpang sa Malitbog,Bukidnon diin nagbaton sa tag-usa ka igo pinusilan sa ulo niadtong Martes sa hapon.
