CAGAYAN DE ORO CITY-Bisan ang Land Transportation Office o LTO-10 ang naningkamot nga malimpyohan ang ilang han-ay batok sa mga empleyado nga nalambigit sa ilegal nga droga ning syudad.
Mi-angkon si LTO regional director Rogelio Poliquit sa Bombo Radyo nga nakadawat sila’g report sa pagpamaligya sa druga batok sa suspek nga si Michael Rey Laureta, hingkod ang edad ug kasamtangang transportation and regulation officer II sa ilang buhatan hinungdan gipasikop sa PDEA-10 ug PNP.
Matud ni Poliquit nga wala siya magduha-duha sa pagdu-ol sa PDEA ug kapulisan aron masapon ang hiwing buhat sa iyang sakop.
Nakuhaan si Laureta sa usa ka pakete sa shabu, P500 nga drug buybust money ug dugang mga gitoohang ilegal nga droga.
Kasuhan sa pagbaligya’g ilegal nga droga ang suspek sa piskalya kinsa gitratar sa PDEA nga high value target.
Una niini, gipangayuan sa Bombo Radyo si Laureta sa tubag apan nagdumili kini ug namugos nga iya rang legal counsel ang mutubag sa mga pangutana batok kaniya.
