CAGAYAN DE ORO CITY-Pahamtanga’g bug-at nga silot subay sa balaod sa kinaiyahan o environmental laws ug ubang kalagdaan ang kompanyang Verde Soko Philippines Industrial Corporation nga nag-operate sa ilang planta sa lungsod sa Tagoloan,Misamis Oriental.
Kini kon mapamatud-an sa Sangguniang Panlalawigan nga nasupak sa maong Korean company ug bisan ang ubang ahensiya sa gobierno nga nagpasagad sa trabaho hinungdan nakasulod ang 5-mil ka tonelada sa imported waste materials sulod sa 51 ka container vans gikan sa South Korea padulong Misamis Oriental sugod niadtong Hulyo 21 ning tuiga.
Gihimo ni Vice Gov Joey Pelaez ang panganti alayon sa ipatawag nga ikatulo nga fact finding hearing sa sangguniang panlalawigan sa Verde Soko Philippines ug mga ahensiya nga nalutsan sa maong mga basura ning adlawa.
Samtang namugos ang kompanyang Verde Soko Philippines Industrial Corporation nga walay dala nga peligro sa panglawas sa tawo ug dili makadaot sa kinaiyahan ang imported waste shipment nga gikan South Korea pasulod sa Pilipinas.
Kini maoy pangatarungan ni Engr Neil Alburo gikan sa Verde Soko Philippines Industrial Corporation dihang nabulgar nga dunay misdeclaration sa shipment dihang midunggo sa Mindanao International Container Terminal o MICT sa Tagoloan ning lalawigan niadtong Hulyo 21 ning tuiga.
Miingon si Alburo nga sa wala pa gibiyahe ang imported waste shipment,gipaubos nila sa health test diin ilang gipamugos nga luwas kini sa panglawas sa katawhan.
