CAGAYAN DE ORO CITY-Gipanguluhan ni City Police Director Sr/Supt Nelson Aganon ang pagsulbad sa pag-ambush kang Supt Michael John Deloso nga hinimuan sa duha ka suspek diha sa Luna-Capitol Streets ning syudad.
Kini human aktibo na ang Special Investigation Task Force Deloso diin gilangkuban ni Aganon,CIDG-10 ug NBI-10 aron imbestigaran ang gidangatan ni Deloso.
Miingon si Aganon nga gilayon sila nagtigom paghuman sa hitabo samtang init pa ang estorya ug paspas matumbok ang motibo sa kremin.
Si Deloso kanhi nadestino sa Cagayan de Oro City Police Office ayha nasaka sa Camp Alagar diin siya deputy commander sa Regional Police Strategy Management Unit sa PNP-10.
Samtang gihupay ni Aganon ang kabalaka sa publiko kalabot sa pag-ambush kang Deloso.
Si Aganon miingon nga walay angayang kabalak-an ang publiko sa peace and security sa syudad kay isolated case lamang ang ambush kang Deloso.
Asoy niini nga klaro nga si Deloso ang target sa ambush ug walay mga sibilyan ang naangin.
Gani, gipamugos niini nga kabahin sa trabaho sa mga pulis ang magbaton sa daghang bahad sa kinabuhi.
Samtang gusto PNP regional director C/Supt Timoteo Pacleb nga madali ang pagsikop batok sa utok sa kremin sa pag-ambush kang Deloso ning syudad.
Kini ang rason nga gimando ni Pacleb ang lapad nga pursuit operation batok sa duha ka suspek nga mipusil kang Deloso sulod sa iyang sakyanan Luna-Capitol Streets syudad kagahapong adlawa.
Matud ni PNP regional spokesperson Supt Surki Serenias nga gihulat ni Pacleb ang resulta sa imbestigasyon sa SITG Deloso aron masuta kon nganong gi-ambush sa wala mailang mga suspetsado.
Miingon si Serenias nga taud-taod na nga nadestino si Deloso sa Camp Alagar sukad nakabalik sa pagka-pulis gikan sa pagpapha sa Ombudsman tungod sa kasong administratibo.
Si Deloso nagbaton sa 12 ka igo sa armas gikan sa motorocycle in tandem suspects nga mi-ambush kaniya
