CAGAYAN DE ORO CITY-Gitutukan karon sa kapolisan ang upat ka tawo isip persons of interest o PO1 sa pag-ambush sa brgy official diha sa 6th-18th Streets,Brgy Nazareth ning syudad.
Kini subay sa gihimong imbestigasyon ni Macasandig Police Station commander Sr/Insp Mario Mantala Jr sa gidangatan ni Jonathan Joseph Borja nga kagawad sa Brgy 3 ning syudad kagahapon sa buntag.
Miingon si City Police Director Sr/Supt Nelson Aganon nga tagsa- tagsa nga ipatawag nila ang maong persons of interest aron sutaon ang kalambigitan nila sa pag-ambush kang Borja diin natapsingan ang agtang niini.
Dugang ni Aganon nga walay kalabutan sa politika ang pag-ambush apan gisubay usab nila ang anggulo sa bangi sa yuta nga gidumala niini sa
bukirang bahin sa dakbayan.
Samtang namugos si Aganon nga pabiling lig-on ang seguridad nga gipatuman kapolisan ning syudad.
Kini bisan nga duha ka sunod nga pagpang-ambush ang nahitabo diin naglakip kang Deloso ug Borja nga kagawad sa Brgy 3 ning syudad sulod ning semanaha.
Miingon si Aganon nga isolated cases lamang ang maong pagpamusil sa mga biktima apan gilayon mihimo’g security adjustments ang PNP aron di na kini subli mahitabo.
Nagpahimangno usab si Aganon sa publiko nga hayan mabati niini ang kahugot sa seguridad nga ilang ipatuman sukad pa kagabie.
