CAGAYAN DE ORO CITY-Mangayo’g tabang ang grupong Kalumbay sa Commission on Human Rights o CHR-10 aron ireklamo ang siyam ka sundalo nga miyembro sa 65th Infantry Battalion,Philippine Army sa pagpangulata sa duha ka batan-on diha sa Brgy Bagocboc, Opol Misamis Oriental.
Gibutyag ni Datu Jomorito Goaynon, secretary general sa grupong Kalumbay nga dili makatarunganon ang gihimong pagkulata sa mga sundalo kang Michael Paborada, 25-anyos ug laing usa ka lumad.
Siya miingon nga nakakita’g bangi ang mga biktima sa ilang mga higala tungod kay pulos mga hubog apan imbis apartahon sa mga sundalo ang mga nanggiaway nga batan-on, ilang gitabanga’g kulata si Michael.
Gawas sa pagpangulata, nagpaboto sa ilang armas ang mga sundalo ug nagbahad sa mga biktima nga ilang patyon.
Samtang gipanghimakak ni 65th Infantry Battalion Civil Military Officer Lt. Chreselle Renoblas ang akusasyon sa grupong Kalumbay nga gikulata sa iyang mga sakop ang duha ka batan-on diha sa Brgy Bagocboc, Opol,Misamis Oriental.
Sumala ni Renoblas nga si Michael Paborada kinsa anak ni Joseph Paborada ang nagpasi-ugda sa kabugot busa gi-aparta sa mga sundalo.
Gani, misukol si Michael hinungdan nga usa sa mga sundalo ang nadunggaban ug narekober sa crime scene ang kutsilyo nga giggamit sa pagpangdunggab. Ipasaka karon sa militar ang kaso batok kang Paborada.
