CAGAYAN DE ORO CITY-Ipatawag sa chairman sa komitiba sa police, fire and public safety si Cagayan de Oro City Police Director Sr/Supt Nelson Aganon sa konseho ning syudad.Kini aron mohatag eksplenasyon sa sunod-sunod nga kasong pagpamusil sa duha ka govt officials ning syudad.
Gibutyag ni City Councilor Romeo Calizo nga bisan personal grudge gikan sa ilang mga kontra ang motibo sa pag-ambush kang Supt Michael John Deloso ug pagpusil kang Barangay 3 Kagawad Jonathan Joseph Borja, kinahanglan gihapon nga bantayan sa mga pulis ang syudad.
Asoy niini nga ngil-ad paminawon ug makadaut sa dungog sa syudad ang mga kaso sa pagpangluthang nga gakahitabo sa dakbayan.Samtang nagtoo si Calizo nga huyang ang intelligence monitoring sa kapolisan sa syudad.
Kini ang rason kon nganong milampos ang mga suspect sa sunod-sunod nga pagluthang kang Deloso ug Borja.
Si Calizo miingon nga nasayod na ang kapolisan sa standard operating procedure apan nagkulang lamang sila sa ilang intelligence monitoring.
Dugtong niini, gihagit ni Calizo ang mga pulis nga utrohon ang ilang mga istratehiya sa intelligence monitoring aron maseguro ang seguridad sa dakbayan batok sa mga kriminal.
Samtang ipalig-on ni Aganon ang police visibility sa dakong bahin sa syudad.
Kini kabahin sa paagi nga masanta ang sunod-sunod nga ambush incidents diin kabahin sa mga biktima sila si Deloso ug Borja ning syudad sa miaging semana.
Miingon si Aganon nga kon wala pa’y mga pulis nga nakit-an ang mga suspek pag-ambush kang Borja sa Brgy Nazareth sa syudad,hayan mamiligro pagsamot ang kinabuhi niini sa miaging semana.
Gimando na usab ni City Mayor Oscar Moreno ang dinalian nga pagsulbad sa maong mga kremin aron gitukod ang Special Investigation Task Group sa syudad.
