CAGAYAN DE ORO CITY-Malugwayan ang presensiya sa martial law sa Mindanao kon subayon ang baruganan sa mayoriya sa 17 ka Regional Peace and Order Council o RPOC sa nasud.
Kini human paminawa sa DILG ingon man sa AFP ug PNP ang mga pahayag sa mga chairman sa RPOC sa gipatawag nga katiguman sa Davao City kagahapon adlawa.
Miingon si Northern Mindanao RPOC chairman City Mayor Oscar Moreno nga miani sa pabor gikan kanila ang posibilidad nga martial law extension sa Mindanao nga gitakdang mohupas sa Disyembre 31 ning tuiga.
Gani,mitambong usab si Pres Rodrigo Duterte sa gipatawag nga National Peace and Order Council o NPOC meeting diin gipasalig niini kanila nga walay mahitabo nga nationwide declaration sa martial law sukwahi sa panaghap sa mga kritiko sa gobierno.
Samtang bisan si kanhi Cagayan de Oro 2nd District Rep Rufus Rodriguez ang dakong uyon nga lugwayan ang martial law sa
Mindanao sa tuig 2019.
Kini tungod sa pabiling presensiya pa gihapon sa mga kontra sa estado nga naglakip sa grupong Maute-ISIS ug Abu Sayyaf Group o ASG nga misabwag kagubot sa Marawi City sa tuig 2017.
Miingon si Rodriguez nga limitado ang gahom sa maong martial law itandi sa panahon ni kanhi Pres Ferdinand Marcos nga naputos sa mag
pag-abuso.
Una niini,gikompirmar ni Moreno nga miubos sa 30 porsiento ang kriminalidad sa Mindanao tungod sa gipatuman nga martial law ning tuiga.
